04/08/2025

Durante o mes de xullo, os mercados bolsistas globais mantiveron a tendencia alcista. O índice MSCI mundial rexistrou o cuarto mes consecutivo de ganancias, apoiado en varios factores chave. A sinatura de acordos comerciais relevantes, especialmente entre os Estados Unidos e a Unión Europea, reduciu significativamente a incerteza arancelaria, ademais de proporcionar máis visibilidade reguladora e relaxar tensións xeopolíticas. Ao mesmo tempo, os datos macroeconómicos indicaron que a economía está estable, sen sinais inmediatos de recesión, o que consolidou a expectativa dunha aterraxe suave nos Estados Unidos e reavivou as probabilidades de recortes de tipos por parte da Reserva Federal despois do verán.

A tempada de resultados empresariais tamén contribuíu ao bo ton do mercado, cun especial protagonismo do sector tecnolóxico, que validou o seu liderado no novo ciclo investidor vinculado á intelixencia artificial. Este escenario animou tanto os investidores institucionais como os pequenos investidores a incrementaren as súas posicións, impulsados polo apetito polo risco e o temor a deixar pasar algo importante. Como resultado, varios índices atinxiron novos máximos. Destacou especialmente o Nasdaq, cunha subida do 3,7%, mentres que os índices europeos tiveron un comportamento máis moderado, lastrados pola tecnoloxía e o sector inmobiliario. As bolsas periféricas, porén, pecharon con avances sólidos, impulsadas polo sector financeiro.

Na renda fixa, subiron as rendibilidades dos bonos soberanos, o que provocou caídas nos prezos da débeda pública, mentres o crédito corporativo mostrou máis solidez. En materias primas, subiu o petróleo Brent e, en divisas, o dólar gañou terreo fronte ao euro, tras percibírense desequilibrios no acordo transatlántico.

Neste contexto, mantemos unha posición equilibrada e neutral en renda variable. O acordo comercial eliminou unha fonte chave de tensión, pero tamén presenta riscos de crecemento desigual entre rexións. A isto súmase un contexto macroeconómico mixto e unha menor liquidez estacional, que poderían dar paso a unha fase de consolidación e dixestión bolsista, tras as últimas subidas a zonas de máximos. Polo tanto, consideramos esencial manter a flexibilidade, a disciplina e unha xestión activa do risco ante un escenario aínda incerto, sensible aos datos e sen catalizadores claros a curto prazo.