21/07/2025

Os mercados financeiros demostraron unha resistencia notable ante as crecentes tensións comerciais, impulsadas principalmente pola fortaleza continuada da economía estadounidense. Nos Estados Unidos, os últimos datos económicos reflicten un robusto comportamento do consumo interno e destaca o incremento mensual do 0,6% nas vendas polo miúdo durante o mes de xuño, o que permitiu reverter parcialmente as perdas rexistradas en maio. Ademais, os resultados empresariais que coñecemos correspondentes ao segundo trimestre superaron amplamente as expectativas iniciais, o que contribuíu a manter unha perspectiva optimista no curto prazo. Non obstante, comezan a apreciarse de maneira clara os efectos negativos derivados das políticas arancelarias na inflación estadounidense, especialmente no IPC, que rexistrou un aumento mensual do 0,3%, o que supón o incremento máis significativo nos últimos dous anos e anticipa posibles repuntas aínda maiores nos próximos meses.

Respecto do escenario comercial entre os Estados Unidos e a Unión Europea, a situación actual é particularmente delicada e incerta. Recentemente, o goberno estadounidense optou por rexeitar un acordo preliminar que contemplaba tarifas do 10% con exencións específicas para determinados produtos estratéxicos e decidiu, en cambio, establecer novas tarifas do 30% que entrarían en vigor a partir do 1 de agosto. Esta decisión xerou unha gran preocupación e tensión na UE, que xa está a preparar posibles medidas de represalia. En resposta, a Comisión Europea confeccionou unha lista detallada de produtos estadounidenses valorada en torno aos 72 000 millóns de euros, susceptible de sufrir tarifas adicionais en represalia. Este intercambio de medidas podería derivar nunha escalada comercial que afectaría de forma significativa a economía europea. Dadas estas circunstancias adversas, é probable que o Banco Central Europeo se vexa obrigado a recortar adicionalmente o prezo do diñeiro na reunión do posible mes de setembro ou outubro, con posibilidades reais de manter unha política monetaria expansiva ata, polo menos, o primeiro trimestre de 2026.

A semana que entra estará marcada por importantes eventos económicos, políticos corporativos que poderían ter impacto nos mercados. No ámbito corporativo, agárdanse resultados trimestrais clave de empresas destacadas como Alphabet, Tesla e Deutsche Bank, unha das principais institucións financeiras máis relevantes de Europa. Estes resultados ofrecerá indicios sobre a saúde financeira de sectores clave como a tecnoloxía, a automoción e a banca, respectivamente.

En canto á política monetaria, o BCE anunciará a súa decisión sobre os tipos de xuro, onde a pesar de que o mercado non contempla anuncios relevantes, os operadores estarán atentos a calquera pista de futuros axustes na política monetaria, especialmente pola persistencia de desafíos inflacionistas na zona euro e o posible impacto no conflito arancelario. Ademais, o gobernador do Banco de Inglaterra ofrecerá a súa testemuña, o que podería revelar perspectivas sobre futuras decisións de política monetaria no Reino Unido.

Desde o plano político e diplomático, celebrarase a cimeira Unión Europea-China, un evento crucial nas relacións bilaterais comerciais e xeopolíticas entre os dous bloques económicos. Ademais, o presidente estadounidense Donald Trump realizará unha visita a Escocia, o que podería atraer atención mediática e política considerable. Ao mesmo tempo, a visita do secretario do Tesouro dos Estados Unidos ao Xapón terá como obxectivo principal debater asuntos relacionados con aranceis e comercio internacional, o que potencialmente influirá nas relacións comerciais entre as dúas nacións.

Finalmente, publicaranse importantes datos económicos. A China divulgará os seus tipos preferenciais de préstamos, un indicador clave sobre a política monetaria chinesa e o estado do crédito no país. Nos Estados Unidos, publicaranse varias referencias no ámbito de indicadores adiantados, como os PMI e o leading index, que seguirán a proporcionar sinais sobre o rumbo futuro da economía estadounidense. En Europa, a confianza do consumidor e os PMI de Alemaña, Francia e o agregado na eurozona ofrecerán unha perspectiva sobre a fortaleza do consumo e as expectativas económicas na rexión.

A inercia actual do mercado ten a capacidade de seguir a impulsar á alza os principais índices bolsistas, incluso en ausencia de fundamentos económicos sólidos que o xustifiquen plenamente. Non obstante, observamos con crecente preocupación a aparente compracencia do mercado ante unha fraxilidade latente que podería revelarse en calquera momento. Aínda que persiste a crenza de que as medidas máis agresivas do presidente Trump se reverterán antes de xerar danos substanciais á economía, a intensificación da súa retórica incrementa notablemente o risco de eventos inesperados.

Ante esta realidade, recomendamos manter un enfoque cauteloso e profundamente diversificado. Non consideramos que sexa o momento para alarmismos innecesarios, pero si para un recoñecemento claro e obxectivo dos riscos latentes: tensións políticas elevadas, fragmentación crecente no comercio internacional, incerteza no panorama macroeconómico global e unha menor disposición da Reserva Federal a ofrecer soporte monetario adicional. Aínda que os activos de risco poden continuar avanzando impulsados pola chamada "escalada do muro da preocupación", a posibilidade de episodios de volatilidade e turbulencia mantense latente. Polo tanto, reafirmamos que a disciplina, a selectividade e a diversificación serán as nosas principais ferramentas para afrontar esta fase do ciclo económico.