Investir en warrants, coñece todos os detalles

Este produto financeiro é un dos máis utilizados polos investidores expertos

Os warrants son un produto bastante habitual nas carteiras dos investidores expertos, xa que poden supor unha fonte de ganancias elevadas. Pero, aínda que están a disposición de quen os quixer utilizar, é importante ser consciente de que para poder facelo é imprescindible coñecer a súa operativa ou contar cun asesor, xa que se trata dun produto de investimento complexo.

Os warrants (explicados dunha forma moi sinxela) consisten en adquirir a posibilidade de comprar ou vender uns títulos determinados nunha data concreta. É dicir, nun día concreto aseguras a opción, non a obriga, de vender unhas accións da túa carteira de investimentos ou comprar aquelas que che interesan. Os warrants son emitidos sobre accións, índices, divisas, etc. Para adquirir o dereito, o comprador debe pagar unha prima. A liquidación será exclusivamente por diferenzas.

Como comentabamos, trátase dun produto de investimento complexo que permite levar estratexias de investimento moi avanzadas como os apancamentos e os posicionamentos (á alza ou á baixa). Estes produtos supoñen unha fonte de grandes beneficios, pero tamén de grandes riscos: ata o 100% do investido, por iso requiren que a posición nestes produtos sexa vixiada de forma constante.

Que estratexia básica se aconsella? Non investir unicamente en warrants, senón facer unha estratexia mixta warrants – valores. Desta forma, utilizamos os warrants como “seguros” e non como principal produto de investimento. Como se fai? Entramos nun nivel máis avanzado: se che interesa este produto, recomendámosche que consultes toda a información que pomos á túa disposición ou que acudas aos cursos gratuítos que ofrecemos ao longo do ano por distintos puntos de España; consisten en dúas horas de formación para que coñezas as súas características, que cobertura proporcionan e a fiscalidade que se lles aplica.