Como xestionar mellor as túas finanzas persoais

Analizar a túa situación financeira presente e futura é fundamental para administrar as túas finanzas persoais de maneira máis eficaz

Unha das obrigas que adquirimos desde o momento no que nos incorporamos ao mundo laboral e recibimos o primeiro soldo é a de sabermos xestionar as nosas finanzas persoais.

Pode soar a tema menor, pois todos sabemos a importancia de domiciliar unha nómina ou de non comprar uns tenis cando xa temos tres no armario sen usar. Porén, non sería algo estraño encontrarnos con alguén que se arruinase por non saber controlar os seus gastos. Moitas veces, o principal motivo polo que adquirimos un produto que non necesitamos ou contratamos un servizo que acaba actuando no noso prexuízo non é outro que o descoñecemento. Cando se trata do noso diñeiro é fundamental dedicar tempo a analizar a nosa situación financeira e a organizar os nosos gastos en función dos ingresos. Unha boa planificación é importantísima para que as nosas finanzas persoais gocen de boa saúde.

Analiza a túa situación financeira presente e futura

Analizar a nosa situación financeira é o primeiro paso para poder facer unha boa xestión das nosas finanzas persoais. Unha boa análise inclúe unha avaliación do patrimonio neto, os ingresos, os gastos e todos aqueles escenarios futuros que suporán un desembolso de diñeiro e que son fáciles de predicir.

Debemos enfrontar a análise como a toma dunha fotografía da nosa economía doméstica. Só así, unha vez feita, poderemos observala desde a distancia e identificar en que momento económico estamos. É dicir, cal é noso capital e a onde nos permite chegar. Ao mesmo tempo, coa análise tamén poderemos ver de maneira bastante fiel cales son os nosos gastos presentes e cales serán as nosas necesidades futuras máis predicibles. Dous aspectos esenciais para poder xestionar mellor as nosas finanzas persoais.

Para analizar a nosa situación financeira presente debemos detallar todos os aspectos da nosa vida persoal, tales como:

  • O número de persoas que integran o fogar. Por exemplo, para as nosas finanzas persoais será moi distinto ter fillos que dependan directamente de nós ou non.
  • O número de persoas que viven no fogar e contribúen con ingresos mensuais. Unha familia con dous fillos con traballo ambos enfróntase a unha situación económica moi distinta á dunha familia igual pero na que ningún dos fillos ten un salario. Se un dos proxenitores está en situación de desemprego, tamén fará que se xestionen as finanzas de maneira diferente a como se faría no caso de que ambos traballasen.
  • O tipo de casa no que se vive e o réxime no que se vive alí. Un piso non ten os mesmos gastos que un chalé con piscina, da mesma maneira que o gasto de alugueiro non é o mesmo que o dunha hipoteca.
  • O tempo que imos vivir na casa actual e co réxime actual. Se temos pensado cambiar de domicilio ou quedar no mesmo pero como propietarios e non como inquilinos, haberá que organizar o noso diñeiro da maneira máis axeitada para poder facer o cambio desexado.

Unha vez analizados todos estes aspectos persoais, é preciso calcular o noso patrimonio neto. É dicir, elaborar unha lista con todas as nosas posesións e, ao mesmo tempo, outra lista coas nosas débedas. Se a última supera a primeira, teremos un patrimonio negativo e será vital comezar a tomar medidas para reverter a situación.

Por último, hai que realizar unha serie de consideracións futuras, sobre todo no referente aos nosos gastos. Neste momento da análise é importante incluír todas aquelas situacións predicibles que, antes ou despois, nos van obrigar a facer un desembolso extra de diñeiro. Entre estes gastos inclúense desde que o coche ou un electrodoméstico rompan ata que a nosa parella quede no paro ou que nos xubilemos. Todo é importante para coñecer polo miúdo a nosa situación económica e xestionar con sabedoría as finanzas persoais.

Un diario de gastos, o teu novo mellor amigo

Se queres aprender a xestionar mellor as túas finanzas persoais, terás que facer o esforzo, polo menos durante uns meses, de anotar todo o que gastas e en que o gastas. É un pouco aburrido, pero asúmeo como un diario persoal, só que de gastos. Esta rutina servirache para identificar os teus hábitos de consumo e para ver rapidamente cales son os ámbitos ou aspectos aos que máis diñeiro dedicas; con este proceder, ademais, poderás tamén facer unha comparativa entre os gastos e os ingresos.

Cando teñas identificados os teus padróns de consumo, poderás eliminar aqueles gastos que son perfectamente prescindibles no teu día a día de maneira fiel á túa realidade e, así, non perder calidade de vida cando recortes. Por exemplo, se ao elaborares o teu diario de gastos te decatas de que diariamente consomes dous cafés fóra da casa, é recomendable que optes por preparar unha cafeteira grande de mañá e levala nun termo. Verás como ao final do mes, con ese pequeno xesto, aforrarás unha cantidade considerable de diñeiro. Tamén axudará á xestión das túas finanzas persoais identificar aqueles bens que tes na casa e nunca usas: se os vendes, conseguirás un diñeiro moi valioso.

Fixa un orzamento mensual e inclúe aforro

Unha maneira perfecta de xestionares mellor as finanzas persoais é establecer un orzamento mensual. É moi probable que ao principio che custe non superalo, pero isto é como o ximnasio ou a dieta, con forza de vontade e constancia non tardarás en axustar todas as túas necesidades a ese orzamento. Ademais, vivir de acordo a un orzamento é, case, a única maneira de garantir que poderás facer fronte a un imprevisto sen quedares sen diñeiro. Vivir con esa tranquilidade é un punto a favor da túa economía e, sobre todo, da túa saúde e benestar. 

Para que o orzamento mensual sexa perfecto e estea completo, debes incluír unha partida de aforro como outro concepto de gasto máis. Aprender a aforrar é fundamental para gozar dunha boa saúde financeira a longo prazo. Aínda que ao principio custe, se inclúes o aforro como unha parte máis do orzamento, non tardarás en facelo de maneira inconsciente. Se aínda así che custa, fixa metas de menor a maior e ten sempre presente o obxectivo dese fondo de aforro: unha viaxe longa, unha casa máis grande, os estudos dos fillos ou calquera cousa que te reconforte máis que gastar ese diñeiro no presente.

Contas - Tamén che podería interesar Contas - Tamén che podería interesar

Tamén che podería interesar

  • Axudan a identificar o banco receptor dunha transferencia, garantindo a seguridade do proceso.
  • Puxemos á túa disposición varias funcionalidades en liña que farán máis sinxelas as túas xestións esteas onde esteas.
  • O tempo que tarda en facerse unha transferencia varía. Explicámosche todo o que envolve a esta operación bancaria.
Contas - Ferramentas Contas - Ferramentas

Ferramentas de contas