Inflación

A inflación é o aumento xeneralizado dos prezos nunha economía durante un período (adóitase medir de maneira anual). Na economía existen moitos prezos, referidos por exemplo aos prezos das materias primas que utiliza a industria ou do traballo (salarios), pero os que preocupan dunha forma especial son o comportamento dos prezos relacionados coa “cesta da compra” habitual, os prezos que pagan os consumidores. Estes prezos reflicten a evolución do poder adquisitivo dunha determinada cantidade de diñeiro ao longo do tempo.

Para medir a inflación en España utilízase o índice de prezos ao consumo (IPC), que elabora o Instituto Nacional de Estatística (INE). O IPC mide a evolución dos prezos dos bens e servizos que consome a poboación residente en vivendas familiares en España.