22/04/2024

Os mercados continuaron con presión pola moderación nas expectativas de recorte de tipos nos Estados Unidos e a recrudescencia das tensións xeopolíticas, que elevaron a aversión ao risco dos investidores. Deste xeito, os principais índices bolsistas mundiais encadearon a súa terceira semana consecutiva á baixa e os investidores esquivaron a débeda americana como refuxio, preferindo outros activos defensivos, como o ouro ou o dólar. Outros factores que tiveron impacto na semana foron as tensións comerciais entre A China e Os Estados Unidos e os anuncios de sancións a Rusia desde a Unión Europea, que tiveron impacto sobre os prezos do aluminio.

A gran repunta do mercado bolsista en 2024 está perdendo moita forza no que levamos de mes de abril, a medida que os alcistas comezan a retirar as súas ganancias. Ante a significativa repunta dos rendementos dos bonos do Tesouro, a maior agresividade da Reserva Federal e a complexa situación en Oriente Medio, a saída de fondos dos activos de renda variable e do crédito máis especulativo acelerouse ao seu maior ritmo nun ano durante os últimos días. O índice S&P 500 caeu todos os días da semana, lastrado pola debilidade das grandes tecnolóxicas. Os Sete Magníficos sufriron a súa peor semana desde novembro de 2022: Tesla e Nvidia caeron un -14% semanal; Apple, Amazon e Meta Platforms un -6%; Microsoft un -5% e Alphabet un -2%. O índice Nasdaq 100 afundiuse máis dun -5% e o estilo de investimento “value” recuperou todo o terreo perdido fronte ao “growth” en 2024.

Neste contexto de maior incerteza macroeconómica e xeopolítica, as valoracións parece que volven importar aos investidores, que castigaron con especial virulencia os sectores máis caros. En efecto, nunha semana en que o rendemento do bono a 10 anos americano superou o 4,60%, arredor de 40 puntos básicos por riba do rendemento das ganancias do S&P 500 (a inversa do PER do índice), o atractivo relativo das accións fronte aos bonos é o máis baixo desde o ano 2022.

As tensións en Oriente Medio reforzaron unha postura máis cautelosa. Neste sentido, Israel atacou a Irán o venres de mañá e, aínda que a aversión ao risco se mantivo contida, persisten as preocupacións sobre a extensión dun conflito que podería facer que os prezos do petróleo superen os 100 dólares por barril. Ata hai poucas semanas, os investidores ignoraran os riscos xeopolíticos, grazas a uns sólidos beneficios corporativos e un crecemento económico enérxico. O S&P 500 subiu un 16% desde que Hamás atacou Israel, un 17% desde os máximos de rendibilidade do bono do Tesouro a 10 anos en 2023 e arredor dun 20% desde que a Reserva Federal comezase a subir os tipos, hai dous anos.

Porén, os riscos empezan agora a estar mellor valorados e estanse limpando a toda velocidade a compracencia do mercado. Neste sentido, aínda que a campaña de presentación de resultados segue sendo en xeral positiva, os investidores móstranse especialmente sensibles ás noticias negativas. Así, noticias como a caída dos envíos do iPhone no primeiro trimestre ou a posibilidade de que Tesla estea pensando en despedir un 10% do cadro de persoal, foron mal recibidas polo mercado. Do mesmo xeito, a decepción na carteira de pedidos da europea ASML, ou o recorte nas previsións de crecemento na demanda de chips exposta pola taiwanesa TSMC, durante a presentación duns magníficos resultados, engadiron lastre ao sector tecnolóxico durante a semana.

E o que a tecnoloxía dá, a tecnoloxía quita: o mercado estadounidense rexistrou unha caída semanal moi superior á das bolsas europeas, que pecharon a semana con retrocesos arredor do punto porcentual e mellor evolución relativa dos mercados periféricos, que conseguiron incluso pechar a semana con subas. No Vello Continente, a debilidade das empresas tecnolóxicas foi tamén moi evidente e o sector foi o farol vermello semanal, xunto ao petrolífero. Pola contra, as empresas de consumo, de telecomunicacións e eléctricas, lideraron a clasificación semanal.

A debilidade bolsista tamén foi moi significativa nos mercados do Xapón, que retrocederon un -6% semanal e nos emerxentes, que se viron penalizados pola evolución das bolsas asiáticas, en especial a de Taiwán.

Con respecto á semana que comeza, nestes momentos de maior incerteza sobre a inflación e de maiores riscos xeopolíticos, as condicións financeiras están volvendo a endurecerse, nun movemento que será ben recibido pola Reserva Federal, xa que implica restaurar parte da restrición monetaria que será necesaria para levar a inflación cara aos seus obxectivos de longo prazo. Neste sentido, valoramos positivamente a actual corrección dos activos de risco, xa que está permitindo purgar excesos de compracencia investidora. Nestes momentos, nin o sentimento nin o posicionamento investidor son tan extremos como o eran hai unhas semanas, o que deixa a porta aberta a un movemento alcista máis sostible nos mercados de renda variable mundiais.

Seguimos crendo que o escenario de aterraxe económica suave é o máis probable en 2024, polo que consideramos que tanto os prezos dos bonos como os das accións deberían ter un bo comportamento no cómputo anual. A curto prazo, porén, a volatilidade dos mercados pode manterse elevada, na medida en que a visibilidade xeopolítica e macroeconómica é limitada.