O nacemento dun fillo e a adopción ou acollemento durante máis dun ano dun menor de 6 anos, ou dun menor de 18 anos con algunha dificultade para incorporarse á familia, dá dereito a un permiso laboral de 16 semanas.

• Se o neno ten algún tipo de discapacidade, o permiso é de 18 semanas.
• En caso de parto múltiple, súmanse 2 semanas por cada fillo a partir do segundo.
• En casos de parto prematuro ou de necesidade de hospitalización do bebé, a nai pode interromper o descanso unha vez cumpridas as 6 semanas obrigatorias. Non obstante, se o bebé queda ingresado no hospital máis de sete días, a baixa maternal pode ampliarse de maneira excepcional tantos días como o bebé estea ingresado ata 13 semanas máis. 
  

Na maternidade biolóxica:

• As 6 primeiras semanas débeas tomar obrigatoriamente a nai en xornada completa.
• As 10 restantes pódense ceder ao pai ou compartilas con el e gozalas simultaneamente.
• Estas 10 semanas pódense gozar en xornada completa ou parcial, sempre que haxa un acordo coa empresa. 

Nos casos de adopción e acollemento:

• Se traballan os dous proxenitores, poden repartirse o tempo para gozar do descanso en paralelo ou de maneira consecutiva. Iso si, deben ser períodos sen interrupción e que non sumen máis de 16 semanas.
• Toda a baixa pódese tomar en xornada completa ou parcial, sempre que haxa un acordo coa empresa.
• Na adopción internacional, cando é necesario o desprazamento dos pais ao lugar de nacemento do bebé, o permiso pode empezar ata 4 semanas antes da resolución pola que se constitúe a adopción. 
  

Prestación por maternidade 

Durante o tempo que está de baixa, a traballadora recibe unha prestación económica da Seguridade Social, equivalente ao 100 por 100 da súa base reguladora (é dicir unha cantidade diaria que se obtén de dividir o soldo antes das retencións entre 30 días).
Requisitos

• Traballar por conta allea, ou ser autónoma ou empregada do fogar e estar ao corrente do pagamento das cotizacións á Seguridade Social.
• Acreditar os seguintes períodos de cotización:
  • Menos de 21 anos no momento do parto: non é necesario.
  • Entre 21 e 26 anos no momento do parto: 90 días nos 7 anos previos ou 180 días en toda a vida laboral.
  • Máis de 26 anos: 180 días nos 7 últimos anos ou 360 días ao longo da vida laboral.

Os pais traballadores teñen dereito a un permiso de paternidade de catro semanas interrompidas. En caso de paternidade múltiple, amplíase en dous días máis por cada fillo a partir do segundo fillo.

• É independente da opción de compartir o permiso por maternidade. É dicir, o pai pode gozar dos dous se a parella así o acorda.
• O permiso pode ser tomado a xornada completa ou parcial, sempre que haxa acordo coa empresa. 
  

Cando é posible beneficiarse del?

• No período comprendido entre a finalización do permiso por nacemento de fillo (2 días por norma xeral), ou desde que se produce a resolución xudicial de adopción ata que finaliza o permiso por maternidade.
• Inmediatamente despois do permiso por maternidade. 
  
  

A prestación por paternidade

Durante a baixa, o traballador recibe da Seguridade Social o 100 % da base reguladora.

Requisitos:

• Traballar por conta allea, ser autónomo ou empregado do fogar e estar ao corrente do pagamento da cotización á Seguridade Social.
• Acreditar que se cotizaron 180 días nos últimos 7 anos ou 360 días ao longo da súa vida laboral.

O artigo 37.4 do Estatuto dos Traballadores establece que o pai ou a nai (só un deles) poden pedir un permiso por lactación para alimentar o bebé ata os 9 meses (ou máis, se o convenio colectivo mellora este dereito). Este permiso non afecta ao salario.

• O permiso consiste nunha hora de ausencia do traballo que se poderá dividir en dúas fraccións (dúas medias horas).
• Existe a opción de substituír o permiso por unha redución de xornada de media hora, á entrada ou a saída.
• Moitos convenios colectivos dan a posibilidade de acumular o permiso en xornadas completas e alongar así a baixa maternal. Esta opción tamén se pode acordar co empresario.

Ambos os pais teñen dereito a solicitar unha redución da súa xornada cunha diminución proporcional do seu salario, sen que se vexan afectados os seus postos de traballo nin os seus dereitos.

• Poden solicitar a redución os traballadores, home ou muller, que teñan a garda legal e o coidado directo dun menor de 12 anos.
• A xornada laboral pódese reducir como mínimo un oitavo da xornada diaria e como máximo a metade.
• O traballador ten dereito a decidir o horario e a duración da redución. Non obstante, os convenios colectivos poden establecer uns criterios atendendo á conciliación laboral e ás necesidades produtivas ou organizativas da empresa.
• O salario redúcese en proporción á parte da xornada que se deixa de traballar.
• Durante os dous primeiros anos da redución, as cotizacións compútanse a xornada completa con vistas a prestacións de xubilación, maternidade, paternidade, incapacidade temporal, etc.

Cando os dous pais traballan e teñen ao seu cargo un menor afectado por cancro ou por calquera outra enfermidade grave, que necesita un ingreso hospitalario de longa duración ou coidados directos e permanentes, un dos pais ten dereito a unha redución de xornada coas seguintes características:

• A redución é como mínimo da metade da súa xornada laboral.
• A duración do permiso coincidirá co período que dure a hospitalización ou o tratamento continuado.
• Como o salario diminúe de forma proporcional á xornada reducida, a Seguridade Social compensa a perda de ingresos cun subsidio equivalente ao 100% da base reguladora establecida para a prestación por incapacidade laboral en proporción á redución da xornada.
• O convenio colectivo pode establecer os supostos polos que esta redución se poderá acumular en xornadas completas.

Tanto o pai como a nai poden pedir unha excedencia (permiso sen soldo) ata que o neno fai tres anos sen perder a antigüidade na empresa.

• Pódese pedir desde o nacemento do fillo ou a data da decisión administrativa de acollemento ou garda.
• Durante o primeiro ano de excedencia por coidado dos fillos, resérvase o posto de traballo. Pasado ese tempo, resérvase un posto dentro do mesmo grupo profesional ou categoría equivalente.
• En caso de familia numerosa, o posto de traballo resérvase durante 15 meses nas familias de categoría xeral, ou 18 meses nas de categoría especial.
• Os tres anos de excedencia contabilizan como período cotizado á Seguridade Social.
• O tempo de excedencia non afecta á antigüidade do traballador na empresa.
• O traballador ten dereito a asistir a cursos de formación profesional durante a excedencia.
• A excedencia pódese gozar de maneira fraccionada.