Análise da actualidade dos mercados

Roberto Hernanz, responsable de Mercados BBVA Banca Privada.

As bolsas apúntanse ao rally do Nadal na súa despedida de 2021

03/01/2022

A incerteza apoderouse dos mercados nos últimos compases de 2021 ante o xiro na política dos principais bancos centrais pola persistencia de altas taxas de inflación, a sorprendente rápida irrupción da variante ómicron e o atraso na aprobación do plan de estímulo fiscal nos EUA. Aínda así, os activos de risco pechan decembro cun bo comportamento, con importantes subas das bolsas nas últimas semanas ao diminuíren en certa medida os temores sanitarios (aparente menor impacto de variante ómicron), e algúns índices lograban alcanzar novos máximos históricos e finalizar o período cerca destes (MSCI World e varios índices americanos). O índice mundial rexistrou no mes de decembro unha suba do 3,9 % (+16,8 % no ano), mentres que a volatilidade pecha 2021 en 17,22 %, preto dos mínimos anuais de 15 atinxidos en outubro. Entre as bolsas desenvolvidas no mes destaca o mellor comportamento de Europa, aínda que no acumulado anual foi a bolsa americana a que liderou a suba, destacando o peor comportamento relativo de España tanto no mes como no cómputo anual. As bolsas emerxentes finalizan tanto o mes como o ano por detrás das desenvolvidas.

O mes de decembro estivo protagonizado polos bancos centrais e, tal e como se esperaba, a Fed mantivo o tipo de xuro de referencia no rango 0-0,25 % na súa reunión e acordou por unanimidade duplicar a redución das compras de activos ($30MM ao mes) co obxectivo de finalizar o programa de compras en marzo de 2022 (tres meses antes do inicialmente previsto). En liña cun ton máis restritivo ante os altos datos de inflación, as proxeccións dos membros do FOMC suxiren tres subas do 0,25 % tanto en 2022 como en 2023. O BCE aproveitou a súa reunión de decembro para anunciar a fin do PEPP (marzo 2022) e aprobou varias medidas para suavizar o impacto en liquidez, como a ampliación do período de reinvestimento das compras do PEPP e o aumento das compras netas no marco do programa estándar de QE (APP) para o segundo e terceiro trimestre de 2022. Ademais, os tipos máis baixos da TLTRO-III terminarán en xuño de 2022, cunha reavaliación do multiplicador de niveis. Canto a outros bancos centrais, destacan a baixada de tipos de Turquía e as subas de Inglaterra, Noruega, Hungría, Polonia, México, Perú, Colombia, República Checa, Rusia, Chile e Brasil.

Nos mercados de renda fixa, aínda que a deterioración da situación sanitaria e a confirmación do final dos programas de compras pesaron na débeda periférica europea, o mes acaba en xeral con estreitamento das primas de risco. No mercado de materias primas as subas de prezos foron xeneralizadas. Destaca a recuperación do cru, a pesar das perspectivas de máis restricións e de debilitación da demanda global. Pola súa parte, o ouro avanza un 3,1 %. En divisas, o euro recuperouse un 0,5 % (-7 % no ano) a 1,1370 dólares.

Os mercados parecen comezar a primeira semana do ano 2022 con certo optimismo e, indubidablemente, mantendo a tendencia positiva de fondo da renda variable.

En síntese, a expectativa é que en 2022 continuará o crecemento económico sólido, apoiado tamén polos estímulos fiscais, cuxos efectos se sentirán neste ano, e polas altas taxas de aforro acumuladas por familias e empresas, que darán soporte ao consumo e permitirán incorporar o investimento das empresas como outro elemento máis do PIB mundial. Este crecemento económico redundará nos beneficios empresariais, principal motor das subas esperadas en renda variable.