Análise da actualidade dos mercados

Álvaro Manteca, responsable de estratexia de investimento de BBVA Banca Privada

A COVID-19 volve condicionar a evolución dos mercados

22/11/2021

A decisión de Austria derramou unha semana que apuntaba a novas subidas bolsistas en Europa e, na sesión do venres, os sectores relacionados coa reapertura económica sufriron un duro golpe ante os temores de que as restricións anunciadas en Austria se estendan ao resto de países europeos, lastrando o crecemento económico de toda a rexión. Non obstante, a pesar da debilidade do venres, o cómputo semanal foi bastante plano para as bolsas mundiais. O índice MSCI mundial retrocedeu marxinalmente e mantense moi cerca dos máximos históricos.

Desde o punto de vista económico, a recuperación global enfróntase á súa primeira proba de resistencia relevante. As presións de oferta seguen intensificándose a medida que os maiores prezos da enerxía se combinan cos persistentes estrangulamentos na cadea de subministración para deprimir a produción e erosionar a demanda. A produción industrial mundial caeu bruscamente por segundo mes consecutivo en setembro, mentres que as lecturas do IPC de novembro é moi probable que superen os xa históricos niveis do mes de outubro. A estes obstáculos súmase unha nova vaga da COVID-19 que vai deprimir a mobilidade europea, aínda que presenta riscos para todo o hemisferio norte ao longo do inverno.

Aínda que os bancos centrais dos países desenvolvidos mostraron unha significativa paciencia coas repuntas inflacionistas relacionadas coa reapertura económica, en claro contraste cos seus homólogos emerxentes, que non mostran tanta tolerancia coas elevadas taxas de inflación (coa notable excepción de Turquía), se se cumpre o noso prognóstico de forte crecemento en 2022 e de acelerada normalización do mercado de traballo, as autoridades monetarias veranse obrigadas a iren cambiando o paso progresivamente. Recalcamos que o proceso de retirada de estímulos será gradual, xa que é probable que as presións inflacionistas se moderen en 2022. En calquera caso, é altamente probable que a Reserva Federal inicie o seu ciclo de subida de tipos na segunda metade do ano e que o Banco de Inglaterra o faga xa no próximo mes de decembro. Pola súa parte, tendo en conta a súa dependencia histórica do financiamento externo, os bancos centrais dos mercados emerxentes vixían de cerca os diferenciais de xuro cos Estados Unidos e é probable que aumente a presión a medida que nos acheguemos á primeira subida de tipos da Fed. Como consecuencia, tamén é moi posible que se intensifique o proceso de subida de tipos nos países emerxentes en 2022.

Entre tanto, os datos que se van publicando suxiren que avanzamos en dirección á esperada reaceleración do crecemento mundial no cuarto trimestre de 2021. Así, as vendas retallistas sorprenderon á alza tanto nos Estados Unidos como na China esta semana. Os datos tamén suxiren unha repunta nos investimentos de capital no Xapón. Canto aos indicadores adiantados, tamén se fortaleceron no Xapón, e as enquisas rexionais manufactureiras de novembro nos Estados Unidos aumentaron con forza durante a semana pasada.

En Asia, o rebote económico derivado do control da vaga delta e do avance do proceso de vacinación está a se materializar con claridade e os indicadores de actividade de alta frecuencia xa apoian un forte crecemento económico no cuarto trimestre. Por desgraza, os datos recentes apuntan o contrario en toda Europa. A pesar dunhas elevadas taxas de vacinación, as novas infeccións disparáronse e superaron os picos anteriores en Europa occidental. Neste sentido, a noticia da semana foi que Austria anunciou o confinamento de toda a poboación e deu o controvertido paso de facer que as vacinas sexan obrigatorias en 2022. A situación alemá ten máis matices, pero unha nova lei prohibirá aos non vacinados participaren en moitas actividades se aumentan as taxas de hospitalización. Continúa a ser difícil predicir como evolucionará a nova vaga neste inverno, pero parece que o impacto sobre o PIB alemán podería ser maior do que se supuña anteriormente, aínda que a boa noticia é que é probable que a maior parte deste lastre se recupere a mediados do próximo ano.

Na China, a reunión do Politburó revelou que se están facendo esforzos para limitar as tensións no mercado inmobiliario, aínda que mantendo a actual política de vivenda. Ademais, o Goberno propuxo unha facilidade de préstamo de 30.000 millóns de dólares para promover a xeración de enerxía sostible. Por outra parte, a reunión virtual entre o presidente Biden e o presidente Xi parece que se centrou na xestión dos riscos xeopolíticos. Para decepción dalgúns investidores, os Estados Unidos non reduciron os aranceis. De feito, algúns aranceis poderían reducirse, sobre todo tras as declaracións da secretaria do Tesouro, Janet Yellen, que se mostrou de acordo con que a redución recíproca de aranceis podería axudar a aliviar as presións inflacionarias en ambas as economías. Non obstante, o feito de que a China non cumpra cos seus compromisos da Fase 1 probablemente seguirá sendo un grande obstáculo. 

En síntese, gran parte de Europa estase vendo afectada por unha nova vaga da COVID-19 e, no transcurso da semana que comeza, os PMI poderían dar algunhas pistas temperás sobre o impacto económico do aumento das taxas de infección. É probable que a enquisa mostre que a recuperación en Alemaña vai minguando conforme nos achegamos ao final do ano. Neste sentido, a enquisa Ifo completará a expectativa sobre a economía xermana e analizará o impacto que están tendo sobre a confianza dos produtores tanto o aumento dos custos da enerxía como a grave interrupción das cadeas de subministración. Nos Estados Unidos, antes do Día de Acción de Grazas saberemos quen gaña a carreira para a sucesión á fronte da Reserva Federal entre Jerome Powell e Lael Brainard. A pesar de que Brainard é un pouco máis laxo que Powell, non se espera que a elección do presidente Biden cambie materialmente a política monetaria da institución. Mentres tanto, as preocupacións respecto do crecemento económico nos próximos meses están xustificadas, xa que o recente aumento de casos de coronavirus nos Estados Unidos e as novas restricións en Europa mostran que a economía aínda non está fóra do alcance da pandemia. A pesar dos maiores riscos sanitarios, seguimos vendo probable que o crecemento global se acelere neste trimestre e que se manteñan os sólidos fundamentos que suxiren un crecemento por riba do potencial en 2022. Aínda que o crecemento europeo se retarda, anticipamos que Asia se recuperará a medida que a mobilidade aumente ao ritmo da taxa de vacinación. Por todo iso, e grazas á fortaleza estrutural dos mercados de renda variable mundiais, cremos que o balance de riscos e oportunidades segue sendo favorable para os activos de risco.