Algúns consellos para escoller un bo nome para o teu proxecto empresarial

Tes unha idea para un proxecto empresarial. Madúrala, moldéala e decides póla en marcha. Un dos primeiros pasos, aínda que non o máis importante nin decisivo, é encontrar o nome perfecto. Ás veces pode fluír á primeira ou, incluso, estar pensado antes de comezar a marcha e outras veces require un bo tempo de maduración. Ante este particular 'reto' hai algúns consellos.

O primeiro, e un dos máis importantes consellos, é que se trate dun nome que resulte fácil de pronunciar, ler, escribir e mesmo de lembrar. Ás veces, un nome pode resultar unha grande idea pero, en realidade, é un suplicio á hora de pronuncialo ou de escribilo nun correo electrónico. Neste caso, menos é máis e, polo tanto, débese ter presente que canto máis curto e impresionante, mellor.

Xunto a esa ‘facilidade’, o proceso creativo ata dar co nome idóneo é fundamental. Especialmente, o feito de deixar libre a imaxinación, sen trabas, a través de distintas técnicas. Nese proceso, sempre a colaboración dos teus socios, ou mesmo de familiares e amigos, pode ser moi interesante e, en definitiva, decisiva para lograr o resultado buscado.

Nese proceso creativo hai que ter en conta que, a pesar da necesidade de ser o máis curto e impresionante posible, o idóneo é que estea relacionado dalgunha forma coa actividade que vai levar a cabo a empresa. É certo que casar ambos os criterios é un pouco complexo, pero hai que o intentar polo menos.

Tras dar cunha boa presa de ideas maduradas vén o máis difícil: comprobar a dispoñibilidade de dominio, se hai algunha empresa cun nome similar ou se esa marca está actualmente rexistrada. Este paso convértese nunha dura criba, pois resulta que moitas das opcións que contemplabas caen tras ese recoñecemento final. É por iso que é case obrigatorio ter múltiples opcións para evitar o ‘baleiro’.

E por último, e non menos importante, hai que desdramatizar. É certo que o nome pode dicir moito dunha empresa e mesmo axudar, e moito, á súa promoción e ao seu lanzamento. Diso non hai dúbida. Pero tamén hai que ter presente que na historia existen innumerables exemplos de compañías que pasaron á historia con marcas que, realmente, non son ningún exemplo de ‘boas prácticas’. Por iso, o mellor consello é: traballa nun bo nome, pero non gastes demasiadas enerxías nel. Seguramente, ao final non mereza a pena.