Merkatuen egungo egoeraren analisia

Roberto Hernanz, BBVA Banku Pribatuaren Merkatuen arduraduna.

Inflazioaren iraunkortasunak estutu egin ditu banku zentralak eta presioa areagotzen die finantza-aktiboei

2022/06/13

Azken bi asteetan argitaratu izan diren datu makroekonomiko gehienak nahiko sendoak izan dira. Ekonomia aurreratuetako PMIek behera egin dute, baina goiko mailetan dira oraindik, eta joera hedakorrarekin. Txinaren maiatzeko PMIak 50 puntu azpitik daude, baina nabarmen suspertu ziren apirileko minimoetatik; gainera, esportazioek zein kredituaren hazkundeak gora egin dute aste honetan Asiako erraldoian, eta ustekabea izan da. Txinako ekonomia erabat zabaltzeari buruzko zalantzak uxatu ez badira ere, COVID-19aren zero tolerantziaren politikak indarrean jarraitzen duelako, eta horrek konfinamendu berriak ekarriko dituenez, badirudi jarduerak hondoa jo duela eta hobetzen hasteko itxura daukala. Beraz, Txinak bizkortzea bilatuko du bigarren seihilekoan, noiz eta Estatu Batuetako ekonomia moteltzea espero denean. Munduko bi ekonomia handienen arteko sinkronia falta horrek lagundu beharko luke eskaera globala maila nahiko neurritsuan egoten.

AEBetako lan-merkatuaren ekainaren 3ko ostiraleko datuek ere lurreratze leun baten kontakizuna berretsi zuten. Enpleguaren hazkunde moderatu baina oraingoz sendoa, lan-indarrean parte-hartze handiagoa eta soldaten gaineko presioen murrizketa dira, antza, konbinazio aproposa azpiko inflazio-presioei eusteko; eta, aldi berean, etxeetako diru-sarrerak sustatzen dituzte. Atzeraldi baten arriskuak, beraz, txikiak dira epe laburrera.

Hala ere, inflazioak jarraitzen du izaten ekonomiaren lurreratze leunerako arrisku nagusiena. Joan den astean, euroguneko inflazioak gorantz egin zuen, %8,1eko urte arteko igoerarekin (%7,8 zegoen aurreikusita). Aste honetan, Estatu Batuetako maiatzeko inflazioak antzeko ezustekoa eman zuen, KPI orokorrak urte arteko %8,6ko hazkundea izan zuen, azken 40 urteko maximo berria delarik, adituek espero zuten %8,3ren aldean. Bestalde, azpiko KPIa urte arteko %6,0n kokatu zen, eta %5,9koa izatea espero zen. Atlantikoaz bestaldean prezioek gora egiteko dituzten oinarri zabalak leku gutxi uzten du lasaitasunerako: energiaren prezioek inflazioa nabarmen gorantz daramaten arren, prezioen gaineko presioak orokortu egin dira eta, dirudienez, errotu egin dira. Ildo horretan, kezkagarria da Michigango Unibertsitateak ekainean egindako inkestaren arabera 5 eta 10 urte bitarteko inflazio-aurreikuspenak %3,0tik %3,3ra igo izana. 50 urte baino gehiagoko historia duen inkesta batean kontsumitzailearen konfiantzak izan duen okertze paralelo handiak, minimo historikoak izan baitzituen ostiralean, garbi adierazten du kontsumitzaileak inflazioari buruz duen kezka. Orain arte, kontsumitzailearen benetako portaera sendoa izan da, inkestek agerian utzitako ezkortasuna gorabehera, baina ikusteke dago egungo sentimendu deprimituak azkenean kontsumo txikiagoa ez ote duen ekarriko; inflazioak zenbat eta gehiago iraun, orduan eta argiago geratuko da hori, metatutako aurrezki-erreserbak agortu ahala.

Inflazioa goian eta jarduera ekonomikoa bereari eusten dela, banku zentralei ez zaie geratzen beren politikak gogortzen jarraitzea ez den beste aukerarik. Joan den astean, Australiako banku zentralak ustekabea eman zuen tasak oinarrizko 50 puntu igota, 2001etik izandako igoerarik handiena, alegia. Era berean, Indiako RBIa uste baino oldarkorragoa izan zen, berrerosketa-tasa oinarrizko 50 puntu igo baitzuen, maiatzean bat-bateko igoera batekin merkatua ezustean harrapatu ondoren. Astean sartuta ginela, EBZk interes-tasak aldatu gabe utzi zituen, espero zen bezala, baina bide irmoki oldarkorragoa trazatu zuen hurrengo bi bileretarako.

Zehazki, Gobernu Kontseiluak bere horretan utzi zituen bere interes-tasa ofizialak, eta iragarri zuen APP programapeko bonuen erosketak uztailaren 1ean amaituko direla, eta, ohi ez bezala xehatutako politika-aitorpen batean, uztailean eta irailean interes-tasak oinarrizko 25 puntu igotzeko konpromisoa hartu zuen. Eta atea ireki zion irailean oinarrizko 50 puntuko igotzeko aukerari. Komunikatuaren formulazioa kontuan hartuta ("epe ertaineko inflazioaren aurreikuspenak bere horretan jarraitzen edo okerrera egiten badu" zioen), oso litekeena egiten du mugimendu hori. Irailaz haratago, berriz, EBZk espero du "egokia izango dela interes-tasetan igoera gehigarriak izango dituen bide mailakatu baina iraunkorra". Merkatuak gordailu-tasa oinarrizko 25 puntu igotzea espero du uztailean, oinarrizko 50 puntu irailean eta oinarrizko 25 puntu hiruhilekoan, %2ko azken tasara heltzeraino.

Merkatuen bilakaerari dagokionez, munduko finantza-merkatuentzat albiste txarrak metatu ziren azken astean. Banku zentralen oldarkortasunari gehitzera etorri zen Estatu Batuetako inflazioaren gailurra jada iritsia zela behar baino lehenago uste izanaren nabaritasuna, eta horrek inflaziorekiko beldurrak areagotu egin zituen berriro mundu osoan, eta ilundu egin zuen lurreratze ekonomiko leuneko agertoki baten probabilitatea. Munduko burtsa-indizeek nabarmen egin zuten atzera azken astean, osteguneko eta ostiraleko saioetan, batez ere. MSCI munduko indizea maiatzeko minimoen eremura itzuli zen, eta S&P 500 indizeak, berriz, 3.900 puntuko euskarri teknikoan oinarrituta amaitu zuen berriro astea. Maila horrek ondo funtzionatu zuen maiatzean, eta joan den hilaren hondarrean ikusi genuen errebotea katalizatu zuen. Erreboteak, nolanahi ere, oso gutxi iraun du, agerian utziz merkatu baxu batean gaudela, beheranzko maximo eta minimoen segidarekin. Hori nahikoa ez balitz, bonu subiranoen errentagarritasunak gora egin zuen berriro, indar handiz egin ere, bai Estatu Batuetan, eta bai, batez ere, Europan.

Laburbilduz, argi dago azken astean zaildu egin dela munduko ingurune makroekonomikoa, eta indarra galdu duela gure oinarrizko agertokiak, hain zuzen inflazio-presioen murrizketa progresiboa eta ekonomiaren lurreratze leuneko ingurunea ezartzen zuenak. Zoritxarrez, inflazioak ez du apaltzeko seinalerik ematen oraindik, eta, ondorioz, banku zentralek oraindik oldarkorrago jokatuko dute moneta-gogortzearekin, egungo ziklo ekonomikoari eustea arriskuan jarriz. Ildo horretan, Txinan ekonomia berriz irekitzeak, manufaktura arloan mundu osoko botila-lepoen arintzea ahalbidetuko duen arren, eragin negatiboak izango ditu energiaren prezioetan ere. Egitez, Txinako hazkundearen eta mugikortasunaren gorakadak energiaren eskaria bultza lezake, petrolioaren prezioak 120 dolarretik gora dauden une honetan, eta murrizketak ekarriko ditu eskaintzan, Mendebaldeak Errusiari jarritako petrolio-enbargoaren ondorioz. Era berean, Itsaso Beltzean ez da aurrerapenik eman gari ukrainarraren esportazioei ateak zabaltzeko, elikagaien prezioen gaineko presioak arintze aldera, eta luzatu egin ditzake munduko presio inflazionistak, agintari ekonomikoek une honetan uste dutenetik haratago.

Datozen egunetan, inbertitzaileek gertutik jarraituko diete dituzte txikizkako salmentei eta Estatu Batuetako etxebizitzen hasierei, kontsumitzailearen eta etxebizitza-sektore garrantzitsuaren osasuna ebaluatzeko. Bestalde, joan den asteko inflazio-datuen ondoren, uste dugu Erreserba Federalak eutsi egingo diola bere mezu oldarkorrari, eta ezin dugu baztertu merkatuak datorren asteazkeneko bileran espero baino igoera oldarkorragoarekin harritzea.

Bien bitartean, argi dago asmatu izan dugula munduko egungo ingurune makroekonomiko eta finantzarioaren aurrean gomendatu izan dugun gure egungo posizionamendu zuhurrarekin, bai errenta finkoan, bai errenta aldakorrean. Joan den asteko dokumentuan ondorioztatu genuen ezen egungo prezio-mailekin nabarmen hobetu direla epe luzean finantza-aktibo askotarako espero ziren errendimenduak. Zentzuzkoa da, beraz, datozen urteei begira zorroa eraikitzen joatea, baina, tamalez, epe laburreko egoerak ez digu uzten baikorregi izaten merkatuek datozen asteetan izan dezaketen bilakaerari erreparatzen badiogu; izan ere, datozen asteetan, errenta aldakorreko aktiboetan posizionamendu laburra izaten jarraitu beharko dugu gure zorroetan.