Merkatuen egungo egoeraren analisia

Roberto Hernanz, BBVA Banku Pribatuaren Merkatuen arduraduna.

Munduko ekonomia eusten ari zaio arrisku nagusien erasoari, eta merkatua itxaropenak doitzen doa, hegakortasun handiz bada ere

2022/06/06

Joan den asteko maiatzeko manufaktura arloko PMI globalak Txinako osasun egoerak munduko manufaktura-jardueraren gainean dituen ondorio negatibo mugatuak azaleratu zituen. Bestalde, ematen du Ukrainako gerrak Alemaniako industriarentzat izan duen eragin disruptiboa desagertzen doala; Estatu Batuetako eta euroguneko lan-merkatuek, ordea, enplegu- eta diru-sarrera-hazkunde handiak sortzen jarraitzen dute, eta hori funtsezko koltxoia da abian dagoen eros ahalmenaren murrizketa handiari aurre egiteko. Oro har, joan den astean argitaratutako datuek berretsi egiten dute gure ustea, alegia hedapen ekonomikoa kaltetua izan dela eta epe laburrerako atzeraldiaren arriskuak txikiak izaten jarraitzen dutela; kontua, nonbait, ez da errailetik irten.

Bestalde, maiatzeko KPIaren datuek gora egin zuten Atlantikoaren alde honetan, eta analistek uste dute Estatu Batuetako inflazioak hileko beste %0,7ko igoera bat izango duela aste honetan ezagutuko ditugun datuekin. Energiaren kostuek gora egiten jarraitzen dute oraindik, eta zerbitzuen prezioek ere goranzko presioak bizi dituzte. Beraz, ez dirudi epe laburrean inflazioa asko jaitsiko denik. Bestalde, gasolinaren prezioen gaineko goranzko presioak eta Estatu Batuetako hipoteka-tasen igoerak pisu handia hartzen ari dira autoen eta etxebizitzen salmenten aurreikuspenetan, eta datozen hilabeteetan industria-produkzioa eta enplegua moteltzeko arriskua dago. Fed-ak eskertuko ditu moderazio kontrolatu horren seinaleak bi aste barru biltzen denean. Azken hiru hilabeteetan langabezia-tasa egonkortu egin dela dioten albisteek, bereziki, lan-indarrean parte-hartze handiagoa izatearekin batera, lurreratze leunaren itxaropenari eusten laguntzen dute.

Asiako eskualdeari dagokionez, nahiz eta hiruhileko honetan Txinak uzkurtze handia izan duen COVID zero politikaren ondorioz, maiatzeko PMIren hobekuntzak adierazten du balitekeela jarduerak berriz ere goranzko norabidearen martxa hartu izana. Gainera, argi dago Txina kontinentaletik kanpoko Asiako industria moteldu egin zela maiatzean, baina horren zeharkako efektua apala izan da orain arte. Joan den hilean PMIek huts egin zuten Taiwanen eta Korean, baina Koreako esportazioak %7 igo ziren maiatzean. Txinara egindako esportazioak egonkortu egin ziren apirilean beherakada handia izan ondoren, eta ekonomia garatuetara bideratutakoak, berriz, sendo mantendu ziren.

Beste arlo batean, badirudi Errusiaren gerrak Ukrainan izan dituen ondorio ekonomikoek eragin handia izan dutela EEEn, inflazioa igotzea eta hazkundea jaistea ekarri dutelako, eurogunean baino garrantzitsuagoak diruditenak. Zehazki, maiatzean Batasuneko 27 herrialdeetako manufakturen PMIak atzera egin zuen argi eta garbi, euro eremuko hobekuntzaren bestaldean, alegia. Adibidez, Poloniako manufakturako PMIa ia 7 puntu jaitsi zen maiatzean, 44,4ra heltzeraino, 2020ko maiatzetik izan duen irakurketarik baxuena eta Errusiako PMI indizeak erregistratutako 47,5 punturen azpitik, gainera. Euroguneko hiruhileko honetako datuak, halere, mistoagoak izan dira, apirileko txikizkako salmentek hileko %1,3 egin baitute behera, Alemaniak izandako atzerakada handiagatik. Industriaren egoera zertxobait hobea da, autogintzako produkzioaren eta esportazioen datuek gora egin zutelako apirilean.

Errusian bertan, maiztasun handiko datuek uste baino uzkurdura txikiagoa adierazten dute, nahiz eta epean luzeagoa izan daitekeen. Espero zen bezala, ahultasuna esportazioarekin lotutako industrietan kontzentratu da, eta barne-merkatura bideratutako sektoreek eutsi egin diote, lan-merkatuak bezala. Kontsumitzaileek presiopean jarraitzen dute, nahiz eta azkenaldiko moneta- eta zerga-malgutzeak nolabaiteko babesa eskaintzen duen. EBk Errusiako petrolioaren gainean duen enbargoak ekoizpena eguneko 1,5 milioi upeleraino murriztu dezake, eta litekeena da hornikuntza-kateko etenaldiek Errusiako industria-ekoizpenean eragiten jarraitzea datozen hilabeteetan.

Merkatuen bilakaerari dagokionez, aurreko asteko burtsa-susperraldi handiaren ondoren, azken egunetan ahulezia itzuli da munduko burtsa-merkatuetara, eta jaitsiera moderatuekin itxi zuten astea. Nolanahi ere, pasa den asteko atzerakada hori aurreko asteko burtsaren aurrerapenaren zati txiki bat besterik ez zen izan. Estatu Batuetan, hegakortasuna nagusitu zen berriro burtsa-merkatuetan. Izan ere, S&P 500 indizeak elkarren segidako 31 saio metatzen ditu egun arteko % 1eko gutxieneko gorabeherekin, eta hamarkada bateko bigarren sortarik luzeenean da. Horrek asko zailtzen ditu inbertsio-erabakiak eta baloreen hautaketa, epe laburreko mugimendu teknikoen mesedetan. Era berean, finantza-merkatuetan dagoen ziurgabetasun handiaren adierazgarri da, ez baitakite zein egoera ekonomiko izango dugun datozen hilabeteetan.

Bestalde, akzioen arteko korrelazioek gora egin dute, COVID-19aren pandemia piztu zenetik ikusten ez ziren mailetaraino. Teorikoki sinkronizatutako mugimendu horiek akzioak hautatzeko aukera ematen dute; izan ere, enpresa onak txarrak bezainbeste erortzen dira, oraingoz funtsezko azterketa horren falta sumatzen dugun arren. Europako burtsa-asteari dagokionez, atzerakadak apalagoak izan ziren; gainera, erdialdeko herrialdeen bilakaera erlatiboki hobea izan zen periferiakoena baino.

Laburbilduz, maiatzeko AEBetako KPIak, ziurrenik, adieraziko du prezioen goranzko inertzia deserosoak jarraitu egiten duela. Ildo horretan, gasolinaren kostuak gora egin zuen maiatzean, eta ekainean ere berdin jarraitzen du; horrek erakusten du apirileko arintzea aldi baterako bakarrik izan zela. Estatu Batuetako eskariak duen erresistentzia, batez ere oraindik gehiegizko aurrezkiak dituzten etxe aberatsenen artean, zerbitzuen inflazioaren gaineko goranzko presioari eutsiko dio, nolabait eutsi ere. Desinflazioa ikusten ari garen eremu bakarrean, hots, kontsumo diskrezionaleko ondasunetan, prozesua ez da prezioen beste goranzko presio horiek konpentsatzeko bezain azkar gertatzen ari.

Inflazio-datuak espero direnak baino handiagoak ateratzen badira, berri txarra izango da Erreserba Federalarentzat, ahaleginak areagotu beharko baititu ekonomia hozteko eta inflazio-tasa handiei galga jartzeko lehentasunezko helburuari begira. Egoera hori, jakina, gaizki hartuko lukete inbertitzaileek, areagotu egingo bailitzateke finantza-baldintzak gogortzeak eragindako atzeraldi ekonomikoa izateko aukera. Era berean, kontsumitzailearen konfiantza, dagoeneko oso maila baxuetan izaki, oraindik gehiago ahuldu liteke. Bestalde, datorren osteguneko politika-bileran, EBZk berretsi egingo du bonuen erosketa garbiak uztaileko lehen asteetan amaituko direla, eta tasak handitzeko planei buruzko orientazio sendoa emango du. Uztaileko eta iraileko bileretan oinarrizko 25 puntuko igoerak iragarriko dituela espero dugu, eta, ondoren, mailakako normalizazio-ziklo bat iragartzea, hiru hilean behin oinarrizko 25 puntuko gorakadak ekarriko lituzkeena. Bestalde, aste honetako bileran EBZk tasen igoera aurreratzeko aukera gutxi badago ere, azpiko inflazioaren datuek justifikatu egingo lukete igoera hori, maiatzean beste %0,3 igo baitzen.

Finantza-merkatuetarako ikuspegiari dagokionez, ziurgabetasunak oso esanguratsuak dira oraindik ere, eta erabat justifikatzen dute, gure ustez, gomendatzen ari garen zuhurtasun taktikoari eustea, arrisku-aktiboek gure zorroetan duten pisua azpihaztaturik baitago. Hala ere, adierazi beharra dago aktibo mota desberdinetatik espero ditzakegun epe luzeko errentagarritasunek aurrerapen nabarmena izan dutela azken hilabeteetan, eta horrek erraztu egingo digu denbora-epe horretan errentagarritasun-helburuak betetzeko erronka.