Merkatuen egungo egoeraren analisia

Enrique Marazuela, CFA CAd, BBVAren Banku Pribatuko inbertsioetako zuzendaria.

Urte Berri On

2021/01/11

Asteroko blogaren lehen posta hau izanik, Urte Berri On zoriontsua opa nahi dizuegu zuei eta maite dituzuenei, osasunez eta zoriontasunez betetakoa.

2020. urtea koronabirusaren urte gisa pasatuko da historiara. Ondorio sakonak utziko ditu, ez bakarrik iraganean, baita etorkizunean ere. Osasun publikoa zaintzeko agindu den urruntze sozialak urrats garrantzitsuak ekarri ditu du birus hau agertu aurretik ere murgildurik ginen disrupzio digitalean. Birusa behin desagertuta, txertoei esker 2021aren amaieran gertatuko dena, lehengoaren aldean bestelakoa izango den normaltasunera itzuliko gara.

Ikuspuntu ekonomikotik, bakealdian gertatu izan den atzeraldi handienetako bat izan dugu, handiena izan ez bada, eta galdera da noiz iritsiko garen COVID-19aren aurreko mailetara; guk 2022. urte amaierarako jartzen dugu herrialde garatuetan. 

2021ean, agintarien laguntza ekonomiko handiekin jarraituko dugu, bai fiskalak eta diruzkoak, eta susperraldi nabarmena espero dugu, ez bakarrik politika horien jarraitutasunagatik, baita txertoei esker pandemia 2021 amaierako guztiz desagerrarazirik egotea espero dugulako ere. 

Nabarmentzekoa da 2020a ez dela izan txarra merkatuentzat, hegazkortasun handia egon den arren. Gure irakurle askok pentsatuko du merkatuak alde batetik eta ekonomia bestetik doazelaren adierazpide bat dela hori. Gure ustean, merkatuek etorkizunari begiratzen diote, ez iraganari; 2020ko akzioen igoerak orduko agertokian onura izan zuten sektore eta akzio gutxi batzuengatik izan zen, ez horien igoera orokor batengatik.

2021. urterako gure iritzia da -eta oraingoan ez gara oso originalak, analisi etxe gehienak ere bat datozelako- suspertze ekonomikoa goratze azkoz orokortuago batean islatuko dela, eta sektore eta baloreen txandakatzea izango dela horren ezaugarrietako bat. Ziurrenik, 2020ko pandemiak eragin zieten baina, hala ere, negozio onak direnek aterako dituzte onurak. 

Gure egunerokoa, baina, ez da aldatu. 77.000 infektatu gehiago dira munduan, eta 1,7 milioi pertsona hil dira dagoeneko birus honen ondorioz. Hori dela eta, pandemiak maila kezkagarrian jarraitzen du eta ez da espero behera egingo duenik aste bat edo bi igaro arte, Gabonetako ospakizunek horren hedatzea ekarri dutelako. Itxaropena txertoetan dago, 24 milioi baino gehiago jarri dira dagoeneko mundu osoan. Administrazioaren lasterketan, Israel da aurrena, biztanleriaren %20k jada lehen dosia jaso baitu, ondoren Arabiar Emirerri Batuak datoz (biztanleriaren %12), eta Bahrain gero (%5).

Arlo geopolitikoan, bi gertaeratan jarri zen arreta: i) Ameriketako Estatu Batuetako Kapitolioaren aurkako erasoak, tamalgarria izan arren, ez zuen inolako eraginik izan merkatuetan; eta, ii) Senaturako hauteskundeetan demokratek Georgian lortutako garaipena, hautetsi presidenteordearen botoarekin gehiengoa izango baitute, doi-doi bada ere, aipatu kamera horretan. 

Arlo ekonomikoan, Europan datuak okerrera doaz, osasun publikoaren mesedetan urruntze sozialerako eskakizun handiagoko neurrien ondorioz, hain zuzen ere. Bitxiena da itxaropenei buruzko inkestek baikortasuna erakusten dutela, eta hori ez da batere harrigarria, txertoak honez gero baditugula kontuan hartuta. Eta Estatu Batuek aldeko zigilua jarri zuten, aldeko eta kontrako adierazleak egon baldin baziren ere. 

Errenta aldakorrean, Senatuan demokratek lortutako garaipenaren ondorioz kasik ziurra den gastu publiko handiagoa -eta, ondorioz, epe laburrean ekonomia suspertuko denaren igurikimen hobeagoa- nagusitu zitzaien gertatutako beste berri txar batzuei, Kapitolioari egindako erasoa, pandemiaren egoeraren okertzea edo uste zen aldean txertaketek daramaten erritmo apala, kasurako. Igoerak azarokoan ikusi genuen soslai berekoak izan ziren: Europaren portaera erlatiboki ona, urruntze sozialak gehien kaltetu dituen sektoreen txandakatzea. 2020ko laugarren hiruhilekoari dagozkion emaitzen kanpaina nominalki hasi den arren, oraindik ez da eragina sortzeko moduko masa kritikora iritsi.

Pasa den astean nobedadeak izan ziren errenta finkoan. Georgian lortutako garaipen demokratikoaren eta han nagusitu den gehiengoaren ondorioz, inbertitzaileek pentsatzen dute izango den gastu publiko handiagoak errentagarritasun gehiago ekarriko dituztela gobernu bonuetan, batez ere inflazioak berriz ere gora egingo duelako. Eta kotizazioek itxaropen hori islatu zuten, Ipar Amerikako erreferentziazko bonua %1,13ra iritsi zelarik. Europan ia ez zen mugimendurik egon gobernu bonuetan. Zerbait aipatzekotan, alemaniar bonuen eta Europa erdialdeko beste herrialde batzuetakoen igoera arina aipatu behar, prima periferikoen moderazioarekin batera. Bonu korporatiboek portaera ona erakutsi zuten, batez ere high yield-ekoak, errenta aldakorrarekin duten korrelazioagatik.

Monetetan, euroaren eta dolarraren arteko egonkortasuna izan da aste osoko ezaugarria, eta yenak eta yuanak ahultasun zantzuak erakutsi dituzte. Lehengaietan, petrolioak gora egin zuen Arabiak produkzioa murrizten zuela zioen ustekabeko albistearen ondoren. Hazkunde ekonomikorako itxaropen hobeak ere zeresana eman behar zuen, metal industrialek %4 egin baitzuten berriz ere gora. Aitzitik, urreak %2,5 egin zuen behera.  

Gure iritzia arrisku aktiboen aldekoa da, pandemiaren egoeraren zailtasunak zailtasun. Akzioak, bonu korporatiboak -high yield-ak barne- eta bonu emergenteak izatea gomendatzen dugu. AEBetako bonuek jaso duten zigor gogorra gorabehera, gobernu bonuak erakargarriak ez direlakoan jarraitzen dugu, inolaz ere. 

Amaiera eman diogu bake garaian uzkurdura ekonomikorik handiena ikusi izan dugun urteari. Bai, behintzat, erregistroak ditugunetik. Burtsak igoerak izan ditu, baina irudi hori sinpleegia da errealitate osoa erakusteko. 2021erako baikorrak gara arriskuko aktiboetan (akzioak, bonu korporatiboak eta bonu emergenteak); izan ere, uste dugu pandemia urte honen hondarrean desagertuko eta susperraldi ekonomikoa gauzatuko dela. 

Joan den astean, Kapitolioaren aurkako eraso ikusgarria izan zen arren, gertaera nagusia AEBetako Senatuko gehiengo aldaketa izan zen, eta hori zerga hedapen handiagoarekin lotu da. Arriskuko aktiboek ondo erantzun zuten, hedapen fiskalak hazkunde gehiago ekarriko duela ulertuta; babes aktiboek, aldiz, ez zuten ondo hartu, inflazioan horren dakartzan ondorioengatik.